占士情迷摔角傳奇

見完偶像High爆屠「牛」

摔角於美國歷史悠久，比賽過程雖是事先編排而且並不是拳拳到肉，但由於招式華麗加上「劇情」發展緊湊，普羅大眾早已將摔角當係劇集咁追。近年靠打摔角殺入荷里活影壇的選手不計其數，當中「蠍子王」狄維莊遜可算佼佼者，但講到經典人物肯定要數90年代紅極一時的Ric Flair嘞。

在夏洛特出世的Ric Flair，上周四專程入場支持家鄉球隊山貓，賽後又到客隊熱火更衣室與球員打招呼。偶像突然出現，「大帝」即時化身小粉絲上前握手，事後更向傳媒表示：「我自細就好鍾意Ric Flair，佢華麗嘅服飾同浮誇演技令我着迷，仲有佢對摔角嗰份熱誠同專業，教曉我未到最後一刻都唔好放棄。我出場撒鎂粉、做Gym方法同落到場打不死嘅精神，統統都係學佢、受佢啟發。」占士將籃球場當擂台一樣，昨日又大開殺戒勁入32分，帶領熱火加時以119比109勇挫到訪的小牛。

快艇不敵勇士2連敗

至於17連勝斷纜的快艇就「洩晒氣」，昨日作客以94比115不敵勇士錄得2連敗，球會班主史特寧的兒子史葛就因服食過量毒品喪生，享年32歲。快艇陣營氣氛低落，明早於「洛城打吡」難讓湖人，「紫金兵團」受讓3.5分寧捧下盤。（now 635周六早上11時30分直播）另外，上月底溜馬對公牛一戰因風雪改期，聯盟已安排此戰於2月5日進行補賽。

本報綜合報道