聽日係星期五！又到快樂星期五！又到開心到飛起嘅快樂星期五，喇喂！
因乜事幹星期五咁高興？冇嘅，人逢喜事精神爽，好人好報心情靚，皆因星期五就係《好報》同讀者見面嘅日子，唔興奮就假啦！
之不過咁喎，開心還開心，功夫茶實在有必要提提大家，事關《好報》實在太受歡迎嘞，有唔少市民只不過行慢咗少少之嘛，咁就失諸交臂攞唔到。所以功夫茶奉勸各位，攞《好報》務必請早，朝早七點半開始港九新界就有百幾個地點派發，正所謂，手快有，手慢冇。當然啦，攞唔到仲有另一個辦法嘅，買一份《太陽報》啦，咁就免費隨報附送㗎喇。
講出真係令人鼓舞，上星期發行嘅《好報》受歡迎程度更勝創刊號，幾十萬份少於一粒鐘就派完，尤其受到年輕讀者同上班一族激讚，個個認為內容豐富又紙質優良，一定要帶返公司屋企同人分享咁話。至於精彩程度不遑多讓嘅《太陽報》，同《好報》相得益彰，產生互惠效應，銷量亦節節上升。
大家或者會問，今個星期《好報》再有乜嘢猛料放送呀？先講講硬件吖，《好報》今期加料炮製，出夠兩冊，總共一百一十二頁，一冊主打娛樂，一冊時事及潮流品味資訊，好事成雙，不容錯過。至於軟件咯喎，雖然功夫茶唔能夠隨便透露機密，不過大家應該記得上兩期嘅封面故事吖，一個阿嬌直擊追蹤，一個成龍獨家專訪，已經成為城中熱話，兩岸傳媒亦爭相跟風報道呀。如果大家仍然想問今期有乜猛料，功夫茶贈你四個字：更加震撼！
除咗追訪名人明星，除咗八盡內幕秘聞，除咗介紹名人家居，《好報》當然要因應時令季節而為讀者呈獻當時得令嘅眼球盛宴啦。即係咁，普天同慶嘅聖誕節就快到嘞，你想品美酒？你想嘗佳餚？你想着靚衫？一份《好報》為你包羅萬有，十足十「聖誕快樂完全實用指南」，想唔眉開眼笑都難。話時話，功夫茶真係非常期待今年嘅聖誕節，原因係坊間盛傳十二月二十一日係世界末日，假如唔使爭崩頭登上方舟都能夠避過大限浩劫，全人類都應該開香檳慶祝末日之後第一個聖誕節啦！
《太陽》銷量勁，《好報》受歡迎，廣告客戶同樣眉開眼笑㗎。喂，讀者多如浩瀚繁星代表廣告效用無遠弗屆，廣告客戶瞓着覺都笑出聲啦。之不過咁，正如讀者攞《好報》請早，功夫茶亦有必要提提廣告客戶，聖誕佳節篇幅有限，落廣告務求貨如輪轉都要及早揚聲，好似搭小巴咁樣叫一聲「有落」，否則落唔切就可惜嘞。
總而言之，快樂星期五又到，好人繼續有好報！