政制及內地事務局局長譚志源早前向多名建制派功能界別議員開出難題，叫佢哋認真諗吓點樣擴闊所屬界別嘅選民基礎，好讓立法會功能界別選舉可向民主邁前一步，但改革嘅大前提係要同時保住工商界同建制派喺界別內嘅優勢，部分議員諗爆頭都諗唔到答案。
目前廿八個傳統功能界別，合共有逾廿四萬登記選民，十九個以團體票或公司票為主嘅界別，加埋晒只得約三萬名選民，當中十二個界別嘅選民人數更少於一千人，成為下一輪政改嘅重點改革對象。不過，大幅放寬選民資格，隨時會令泛民贏得大部分的功能議席，令到特區政府施政更加困難，中央同建制派都唔想見到呢個結果。
其實要改革政制，嚟緊都係好弔詭，因為建制派唔想改，泛民又點改都嫌唔夠民主，所以喺所有方案提出之前，就可以預計擴闊選民基礎但又在立法會得到足夠票數通過，根本係天方夜譚。
由於情況係咁，功能組別議員亦唔會諗計拆自己台，唔會花心思為政府動腦筋。不過譚志源點都要提啲方案出嚟討論吓，要畀人睇到，政府已經盡晒力，但係立法會不能通過，責任不在政府。