政情:青聯座談預36位 人大「推薦名單」曝光?

香港青年聯會尋日喺中華出入口商會舉辦咗個座談會,畀參選今屆港區人大代表嘅候選人講吓自己嘅政綱同理念。不過,會場入面竟然掛出一塊只有三十六個空位嘅紙牌,而且最後出席呢個座談會嘅候選人數,又咁啱只有三十六人,唔通呢個就係喺坊間所流傳嘅「推薦名單」?

主辦單位就話,喺邀請各候選人出席後,只收到近三十位候選人回覆,再預多幾個位畀啲冇覆但又會臨時出席嘅候選人,咁咪喺紙牌上留住三十六個位先囉。

座談會舉行咗近兩小時,而各候選人發言時,除咗將自己功績「晒冷」之外,仲各具特色o架。例如「愛國歌手」張明敏雖然冇唱歌,但喺講到希望推廣普通話普及化時,即時「轉台」講普通話。新界社團聯會理事長陳勇講到推廣青年人認識基本法時,又即時攞出本基本法喎。不過,最叻嗰個都係前保安局局長李少光,佢喺發言入面除咗講自己嘅理念之外,仲順便回應埋傳媒嘅報道,話有報道指佢唔關心內地發生嘅事,呢啲只係因為佢尊重「一國兩制」,所以唔回應唔代表唔關心喎。

第一手消息請下載on.cc東方互動iPhone/iPad/Android/Windows Phone Apps