政情：CY搬完竇 急不及待復耕
一向熱愛耕種嘅特首梁振英（CY），自從年初參加特首選舉後，一直都冇時間重拾愛好，搞到自己山頂大宅內嘅耕地幾乎完全荒蕪。但最新消息係CY早前正式遷入禮賓府後，近日已正式開始復耕，而且一種就四款農作物，包括有粟米、油麥菜、菜心同蘿蔔。
去理大校慶 童真玩偷食
除咗耕種外，CY未來會增加開放禮賓府，就好似下月聖誕節，CY就預備開放禮賓府畀一班來自基層家庭嘅小朋友，為數有成幾十人，成班齊集禮賓府慶祝聖誕，仲會為府內嘅聖誕樹亮燈添。仲有呀，據聞CY已經落咗指令，若然問責班子有需要招呼來訪貴賓，隨時可以出聲借用禮賓府，佢無任歡迎。
講開又講，尋日CY百忙之中都抽空出席母校理工大學七十五周年校慶酒會，除咗戴番七一年嘅學生時代校呔贈興外，並與一眾嘉賓為一個七百五十厘米嘅長蛋糕主持切餅儀式。話說率先上台嘅CY喺等待一眾嘉賓上台期間，一直望住蛋糕圍邊嘅士多啤梨，最終忍唔住取出一粒放入口食，仲好味到吮埋手指啲忌廉添，然後露出童真嘅笑容。我哋發現佢前後總共偷食咗三次，莫非佢未食飯太肚餓？