政情：易志明呻港鐵扶手吊環高

究竟係乜尷尬嘢呢，原來阿易覺得港鐵車廂中嘅扶手吊環太高，眼見好多嬌小女士都好難掂到，個個惟有逼晒喺車門扶住條柱。阿易話就咁樣搞到乘客入唔到車廂中間，令載客效率大大降低，如果港鐵將個扶手吊環校低少少，已經方便好多。

除咗交通，阿易連航運都要睇埋，好似近排有航空公司想禁運魚翅，又要佢出手調停。佢話暫時無法例限制航空公司接咩客，但道理上只要唔係非法貨物，無理由禁運喎，呢幾日就會約航空公司傾偈，諗下點拆掂佢。

阿易話未上任都咁多嘢做，真係覺得上手劉健儀好犀利，能夠擺平咁多方唔同勢力，今後要繼續跟佢學嘢。