不過佢尋日放軟口氣，話政府對市建局管理層一向有六年需換人嘅規矩，佢個人傾向遵守，但仲要睇政府同市建局嘅需要。睇嚟佢係為特首梁振英留條後路，事緣增加供應解決房屋問題係港府一個重要策略，或者特首好需要佢留低，令市建局可發揮更大功能呢。
有「公職王」之稱嘅張震遠多年來曾任多個重要職位，包括香港商品交易所主任同公務員薪酬趨勢委員會主席等，其中市建局主席嘅任期到出年四月三十日屆滿，連同同樣出年二月任期屆滿嘅行政總裁羅義坤，市建局將有兩大巨頭流失，出現人才荒，唔少人都關心佢嘅去向，佢尋日就喺市建局需求主導記者會度公開回應，話自己傾向遵守政府六年需換人嘅期限，但又要睇政府同市建局嘅需要。