中環出更：龔中心叫學生多食蛋

龔因心同龔中心兩姊妹，今年代表華懋慈善基金向鮮魚行學校捐款十五萬元，已經係第三年捐款贊助學生，龔因心坦言同同學們好似老朋友咁，因為大家都已經見過好多次面，佢鼓勵大家要有目標，但唔係要將來做律師醫生呢啲大目標，只係訂立近期目標，激勵同學每日都要有進步。之後佢哋仲喺學生陪同下主持插竹儀式，寓意學校收生人數節節上升，同學學業進步。有兩位咁有心嘅前輩嚟支持自己，有學生以琴音道謝，亦有同學送上水墨畫以表謝意，場面莊嚴而溫馨。