中環出更：仁濟大家庭 齊食素菜積福
潮流興食素撐環保，愛心爆棚嘅一班仁濟醫院董事局總理，早前拉大隊去沙田麗豪酒店嘅富豪坊歎精緻素宴，齊齊食素積福。茹素多年嘅總理黃美斯（Macy）大力推介呢度嘅素菜，事關酒店太子女羅寶文都係食素之人，水準自然有保證啦。當晚唔少總理帶埋小朋友出席，幾個小豆丁初時好怕醜，個個變身樹熊攬實爸媽，後來玩熟咗就霸住個舞台及咪，不停咁勁唱兒歌，搞到好似幼稚園家長同樂日咁。
當晚現身同樂嘅有副主席蘇陳偉香、馮卓能夫婦，總理王賢訊（Vincent）一家三口、鮑誠業夫婦、葉恭正夫婦及囡囡等，前主席李文斌太太Amanda亦同兒子齊現身，氣氛好熱鬧。唔講唔知，仁濟董事局內「親戚」關係複雜，事關Vincent嘅一歲囡囡啱啱同Macy上契，Vincent笑稱以後要同Macy分擔一半湊女費用，衣食由佢負責，住行就由契媽負責，聽到Macy淨係識笑。
玩具車氹小朋友
有「親戚」關係嘅仲有總理郭小瑜，原來佢係Amanda囝囝嘅契媽。小瑜話為咗同契仔培養感情，試過入住李家三日，同BB仔日夜相處，期間乜都要做，只係冇換埋尿片，咁先至氹到契仔同佢Friend啲咋！Macy哥哥黃文彪及表妹賴煒琳亦喺度，做玩具生意嘅彪哥帶好多玩具車嚟氹小朋友，睇到班大男人嘈住要埋一份。
曾經係職業賽車手嘅KCMG賽車公司董事總經理葉恭正，兩年前大女出世後就退居幕後專心湊女，佢笑稱心思思想復出，正同太太攞緊批文喎！
卓妮