中環出更：黃家和首次抱孫笑唔停
龍年旺添丁，餐飲聯業協會會長黃家和（Simon）前日都「升呢」做爺爺，佢嘅公子黃浩鈞（Howie）同太太Iris嘅愛情結晶品喺養和醫院順利出世，肥Ｂ女足八磅重，真係恭喜晒！Howie坦言，首次做爸爸緊張到失晒魂，喺產房一路陪住太太打氣，點知到最重要一刻，竟然唔記得剪臍帶，但佢笑言，下胎一定會記得喎！
BB女比預產期早一日出世，頭髮多多，個樣望落好成熟，至於似爸爸定媽媽多啲，Howie就笑笑口話兩個都似，因為佢同太太好有夫妻相。原來BB誕生之際，Simon正在大埔沙螺洞考察，突然收到Howie用手機傳過來嘅BB相，知道自己抱孫，即時開心到笑唔停，更連忙告知好友。初次抱孫嘅Simon話，打算遲啲購入同年份嘅法國佳釀，送畀孫女做禮物。
BB女取名叫Olive，Howie解釋話，Olive即係橄欖，橄欖樹係全球最長壽嘅樹，又有神聖嘅意思，希望囡囡長壽健康，成為掌上明珠。太太咁努力，Howie拍心口應承，會送大大粒嘅鑽石答謝愛妻，真係甜到漏。