中環出更：雙陳Fun遊絲路
絲綢之路近年熱爆，名人都爭相到此一遊，保良局副主席「鯊魚女」陳細潔（Abbie）與潮州商會青委主任陳光明（Johnny），早前不約而同趁暑假遊敦煌。Abbie難忘凌晨四點起身騎駱駝上山睇日出；Johnny就話遊莫高窟時，突然遇上風沙，慶幸頭頂「光禿禿」，風沙用手一抹就掃走晒。
首次遊敦煌，Abbie與廿多位好友同行，抵達後首個節目，係前往鳴沙山睇日出。凌晨時分出發，團友個個睡眼惺忪，但Abbie就好high，事關呢次係第一次騎駱駝，佢邊行邊回望身後長長嘅駱駝隊伍，十足拍絲綢之路。抵達山腳後，仲要行好多級樓梯上山，登頂一刻，剛好曙光初現，晨曦美景，令人迷醉。Abbie笑言，恨不得與男朋友在此山盟海誓，可惜真命天子至今仍未出現。
講到食，都有唔少趣事。話說敦煌烤羊頂呱呱，點知上枱一刻，店員將全隻烤羊奉上，燒得焦黑嘅羊頭擺在面前，帶點恐怖，令愛吃羊肉嘅Abbie大叫冇胃口。
另一邊廂，Johnny都同好友遊甘肅蘭州及敦煌，呢次係佢第三次遊絲路，熟晒地頭，但Johnny堅持玩盡絲路，所以天天趕路，日日換酒店。數難忘景點，唔少得黃沙萬里嘅大漠風光，佢話睇見精神為之一振，胸懷大開喎。
陳光明體會光頭好處
沙漠刮風沙係家常便飯，有日遊覽完莫高窟出來，Johnny突然遇上一陣風沙，女團友紛紛以毛巾遮擋，Johnny怕人家笑佢「姿整」，一於企定定「閉氣」任沙吹，最後吹得一面沙粒，幸好佢係「光頭佬」，沙粒一掃就清晒，佢仲自嘲一番：「終於覺得，原來光頭係咁方便。」
卓妮