政情：曾憲梓625萬獎神九航天團隊
啱啱完成天宮一號與神舟九號載人交會對接任務嘅太空人景海鵬、劉旺及劉洋等航天員訪港團，將於明天展開為期四日嘅訪港行程。對太空人一向無限支持嘅前全國人大常委、金利來集團主席曾憲梓，周六將喺九龍海逸君綽酒店，為太空人舉行盛大嘅歡迎活動及頒獎大會，繼續以真金白銀鼓勵太空人為中國人寫下光輝歷史。今次亦係有中國首位女太空人訪港，料將掀起一陣太空熱潮。
曾憲梓喺○四年成立嘅「曾憲梓載人航天基金會」，向航天人員致崇高敬意，並為國家培養更多高質科技人才。基金會分別設立特別貢獻獎和突出貢獻獎，每年撥五百萬元人民幣獎勵優秀卓越嘅航天科技人員。基金會理事長曾智明話今次會發放六百二十五萬港元獎金。自成立以來，基金會已頒發咗特別貢獻獎畀六位太空人，另有一百六十七名科技和管理人員接受突出貢獻獎，獎金累計達三千幾萬元人民幣。