政情：頒獎禮「拉布」 曾太黑面
貪曾尋日出席任內最後一次立法會答問大會，面對市民抗議及議員公審。另一邊廂，貪曾嘅老婆曾鮑笑薇，尋日就出席一個慈善團體活動，以會長身份上台頒獎畀過百位得獎者。本來呢啲慈善公益活動，係應該開開心心嘅，不過曾太就唔知點解一度黑面，唔通係佢老公傳授黑面絕技畀佢？
話說曾太開始頒獎時仲笑笑口，但頒頒吓先發現唔對路，得獎者名單好似水蛇春咁長，足足有百幾人，結果搞咗成大半個鐘都未頒完。曾太企喺台上仿似人肉頒獎機器，笑容愈變愈僵硬，最後直情無晒表情，塊面仲黑黑哋。反觀另一頒獎嘉賓、前恒生銀行一姐梁高美懿嘅笑容就真切自然得多喇！
究竟係頒獎程序太過冗長吖，定係曾太知道老公貪曾喺另一邊畀班議員狂插緊，所以擔心到影響心情呢？睇嚟只有佢自己先至知道喇！