你「拉布」、我「剪布」，雖然兩種「布」性質完全唔同，但就有共通點，就係搞到泛民主派同建制派兩方面都失晒預算。人民力量同社民連上月為咗拖垮《議席出缺安排條例草案》，發起拉布戰，結果立法會主席曾鈺成突然出手剪布，搞到泛民內部徬徨失措。人民力量黃毓民已成功抽到籤喺本月廿七日立法會大會上向曾主席提出不信任議案。
雖然毓民呢個議案就算通過都無實際作用，加上肯定過唔到，但至少畀機會大家傾吓，等人知道泛民有幾唔妥曾鈺成。不過，毓民呢個如意算盤未必打得響，事關之前拉布已經拉咗唔少會議時間，令到大量議案積壓，毓民呢個不信任動議一定會被押後，計計埋埋，隨時拖到過咗七月十八日會期完結都未必傾到，相信又係煲無米粥，令曾主席成為拉布嘅受惠者。