中環出更：張曼娟「水土不服」告別香江
近期有關光華新聞文化中心主任張曼娟「水土不服」嘅消息甚囂塵上，傳聞話佢對工作意興闌珊，有意辭官歸故里。尋日光華證實有關傳聞，話才女本月底就會離任，下周四將舉行告別記者會。至於乜嘢原因導致佢只做九個月就唔想玩，官方話到時由佢親口講喎！
本周二，張曼娟仲同台北經濟文化辦事處處長朱曦一齊會見傳媒，卓妮梗係第一時間同才女打聽傳聞真假。不過，張曼娟就顧左右而言他，搞爛Gag話呢排真係水土不服，肚屙咗幾日，連腰身都返晒嚟添！
不服做龍應台下屬？
其實台灣圈子一早已流傳有關消息，消息話才女去年膽粗粗由文壇跨過政壇，雖然身邊朋友及粉絲都勸佢三思，但佢抱住一腔熱血及理想，就帶埋父母一齊展開香江新生活。點知香港生活應酬多多，又經常要招呼內地嘅文化界人士及官員，令到才女愈來愈感到疲乏。加上父母因為唔適應香港生活，已早一步離開香港，令才女毅然決定離開，不戀棧官位。
不過，有口痕友話，上月台灣新政府上任後，裁撤行政院新聞局，令原本屬於新聞局駐港機構嘅光華，被歸入新設立嘅文化部管轄，首任文化部長係港人熟悉嘅大作家龍應台。張曼娟喺文壇上嘅地位亦唔弱，但依家就變成龍應台嘅下屬，唔怪得佢要走喇！
卓妮