政情：葉禮德讚袁國強口碑好
新任香港律師會會長葉禮德（Dieter），尋日聯同兩位副會長林新強及熊運信見記者，除咗講吓來年大計外，亦答咗唔少熱門話題。好似被盛傳擔任下屆律政司司長嘅資深大律師袁國強可唔可以捍衞法治就成為焦點，但Dieter就話唔評論未經確定嘅人選喎。
Dieter話，認識袁國強多年，佢間律師行以往亦多次轉介個案畀本身係資深大律師嘅袁國強處理，客戶對其表現滿意，但就點都唔肯講對方係咪做律政司司長嘅合適人選。不過佢就話，希望新任司長可以幫手擴展市場，等法律界多啲商機。
「雙非」問題鬧得熱烘烘，釋法同修改《基本法》各有支持者，Dieter認為，兩種方法都唔夠行政措施快而有效，即使要釋法，亦應該有案件先去做，叫政府千萬唔好自己亂嚟。另外，律師會嚟緊會安排年輕律師去港交所上市科實習，學吓上市合併係點搞喎。