政情：EQ沙田鄉委會頭頂戙牌
立法會新界東選情亂過亂世佳人，我哋早前講過三個疑似女參選人各出奇招冧選民，但講到尾喺新界東出選，點都要得到鄉事派祝福，近日其中一名疑似參選人、沙田區議員葛珮帆（EQ）喺沙田鄉事委員會會址「頭上」，掛咗幅大型橫額騎住沙田鄉委會幾個字，話無鄉事派暗撐佢都無人信啦！
鄉事派喺每次選舉嘅取態都會對選情有微妙影響，各大政黨都力爭做佢哋嘅代言人，其中EQ疑似喺幾名女候選人中率先跑出，上月底率先喺沙田鄉委會會址天台掛咗幾幅大型橫額，宣傳佢有份搞嘅「珍愛環境攝影展」，難得喺當眼位置做宣傳，EQ亦「一物二用」放埋自己嘅大頭相提升知名度。
EQ戙旗參選，據聞新界社團聯會（新社聯）成員李世榮及李家良都會跟EQ張名單出選，換句話EQ除咗獲鄉事派力撐外，仲得到新社聯祝福，睇怕其他疑似參選人要諗吓宣傳策略迎戰喇！