中環出更:潮人聚首 共商大計

潮州人出名愛熱鬧,「家己冷」不時齊歎家鄉菜,聯絡鄉情。結集一班潮商嘅海外潮人企業家協會日前就喺德輔道西嘅潮州會館聚首一堂,會內高層猛人多,好似「K金大王」胡良利(萬益)珠寶老闆胡楚南、創會主席劉坤銘、現任主席冠忠巴士老闆鄭敬凱(Andrew)、藍帶啤酒亞洲區總代理葉振南(Stephen)等,大家就會務發展交流意見。

身為副會長嘅胡楚南當晚自掏腰包,宴請大家品嘗精緻潮州特色菜,包括清燉荷包鱔湯、栗子大芥菜煲、銀杏芋泥等,會務顧問Stephen就豪爽包起全場紅酒同啤酒,美酒佳餚當中,傾談都開心啲。創會主席劉坤銘就話,協會至今已創立十一年,期望團結潮青企業家,佢仲加入咗「國際潮青聯合會」,凝聚世界各地「家己冷」添。主席Andrew就最想招攬多啲潮青會員,集思廣益。

王凱曼睇好上海市場

一班協會成員除咗瞓身搞好會務外,自己盤生意都搞得有聲有色,好似Andrew嘅巴士公司生意,主要喺內地發展長途巴士,仲開發埋旅遊風景區添,好似四川九寨溝旁邊嘅畢棚溝,風景相當優美。至於胡楚南嘅新抱王凱曼(Carmen),佢話接管公司後好忙,嚟緊要飛到上海出席珠寶展,主力推介度身訂造嘅高級珠寶。Carmen話,上海開放得較早,公司睇好當地發展,已設立上海辦事處,對今次參展頗有信心。

卓妮

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報