政情：何鍾泰爆困升降機做英雄
位於銅鑼灣嘅工程師學會雲集升降機安全問題專家，會址出現困升降機事故理應少之又少，不過原來幾年前工程師學會會址所屬大廈嘅升降機亦出現過困升降機事件，而工程界議員何鍾泰（Raymond）亦身在升降機中，不過佢唔單止唔驚，仲幫手安撫升降機中又驚又怕嘅市民。
立法會前日討論《升降機及自動梯條例草案》，一直關心呢條草案嘅Raymond喺會後自爆曾受困升降機之苦。Raymond話，自己有次去工程師學會開會，點知咁啱遇到升降機困升降機，當場有女人即時暈倒，有個「大隻男」瘋狂拍打升降機門想自行逃生，另外仲有四個學生妹瑟縮一角，唯獨Raymond處變不驚，四十五分鐘後終於等到警察消防人員到場，大家先得以一同逃出生天。
年逾七十歲嘅Raymond一直希望搵到業界接班人，但至今仍然係只聞樓梯聲響，今次佢講出困升降機事件，明顯自證健康好好，莫非係想為再度競逐連任鋪路？