政情：唐媽媽踢爆囝囝行蹤
特首選戰曲終人散，名落孫山嘅唐英年失意離港散心，相反唐媽媽唐尤淑圻就鬼咁風騷，仲回復當年爆料本色。唐媽媽尋日單拖現身保良局就職禮，自爆特首選舉當日約咗保良中人打牌外，仲爆料話去咗美國探女嘅唐唐，會大約喺本月二十日返港。言下之意，阿仔嘅行蹤仍然在唐媽媽掌握之內。
對於唐唐敗選後悲傷灑下男兒淚，究竟唐媽媽心情係點嘅呢？唐媽媽話：「唔失望，無所謂啦，唔使咁辛苦！」佢睇得咁開，究竟真係放低咗吖？抑或係吃不到的葡萄是酸的？不過，睇番選舉當日，唐媽媽都無站台支持阿仔，反而走去開枱打麻雀就知佢睇得開啦！
選舉日打牌唔站台
咁關鍵時刻開雀局，莫非一早打定輸數？唐媽媽答得玄之又玄話：「佢哋（雀友）想氹番我開心嘛！」又係嘅，打牌自娛好過站台喊苦喊忽咁傷感啦。