廉政公署前日高調拘捕多名新地高層同外號肥龍嘅前政務司司長許仕仁，引起政商界議論紛紛。雖然案件仍在調查階段，唔應該未審先判，但係肥龍成為廉署成立以來被捕嘅最高級官員，難免會加深市民對「官商勾結」嘅印象。民主黨立法會議員李華明就話，煲呔曾已經捲入貪腐醜聞，今次連前特區第二把交椅都出事，市民梗係會有「上樑不正下樑歪」嘅感覺。佢建議政府好好檢討高官利益申報制度，同埋檢視喺執行上有冇出咗問題。
