我哋成日話夕陽政府等收工，絕對唔係空口講白話，事關立法會剛剛通過預算案，「史上最廢財爺」鬍鬚曾就即刻走去放大假，憲報尋日公告，佢由下月五日開始，連放兩星期大假，搞到要由財經事務及庫務局局長陳家強及發展局局長林鄭月娥分別署任，亂晒大龍。其實鬍鬚曾好大機會無得撈，不如等到卸任後先一次過放假咪仲好。
鬍鬚曾喺今年二月初上電台節目時，公然話預算案通過後就會考慮去留問題。大家都知，佢任內經常低估盈餘、高估赤字，令庫房水浸，跟住有錢又唔係善用盈餘幫助有需要嘅人，終令佢民望一直喺低位徘徊。早幾日立法會辯論預算案時，佢仲好似想博反彈咁，「狼來了」警告大家要提防有人趁住政府交接，衝擊香港金融系統，可惜佢嘅言論無人有興趣。
其實鬍鬚曾放兩星期大假諗吓前路都好嘅，但唔係諗去留問題喎，因為佢做得咁差，睇怕都無得留低，不如諗吓卸任後有乜着落仲好啦！