- on.cc 東方互動主頁
- 3月31日 (一)
清朝雍正皇帝嘅第十代嫡孫愛新覺羅．燾健尋日現身灣仔，為佢下個月首次喺香港舉行嘅皇室書法藝術展熱身，同場仲有以擅長畫魚而自成一格嘅「中國魚王」宋守友。兩人應香江文化交流基金會主席江素惠及香港富興投資總裁鄭雙慶邀請，下月廿日喺灣仔華潤大廈展覽中心聯袂舉行書畫展賣會，並一連四日喺現場為市民作畫題字。想近距離一睹中國末代皇朝後嗣真面目嘅市民，萬勿錯過啦！
燾健係雍正第五子弘晝嘅後人，弘晝即係乾隆皇帝弘曆嘅細佬，而燾健嘅母親詹慶芝就係中國著名歷史人物詹天佑嘅孫女。燾健尋日表現低調少言、謙遜有禮，喺佢身上已睇唔到帝王之家嘅霸氣。佢嘅書法師承伯父愛新覺羅．啟功，啟功喺瘦金體嘅基礎上自創「啟字體」，喺書法藝術界享有極高地位。燾健話，佢已習字廿八年，朝朝三點起身練字，每日練足四個鐘。佢話自己雖然有皇室血統，但其實都係普通人啫！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
