中環出更：黃家和想當年 教CY沖奶茶
候任特首梁振英（CY）唔止種瓜種菜叻，其實佢沖絲襪奶茶都有一手，CY嘅師傅原來就係「梁營」嘅悍將黃家和（Simon），佢仲拎出一張陳年舊相，力證CY的確係「沖得」。
台風災籌款 10分鐘學識
身為餐飲聯業協會會長嘅Simon，前晚以主席身份出席香港食品業總會廿八周年誌慶兼聯歡宴，曾參與飲食界選委嘅「星火行動」成員、「燕之家」老闆白富鴻，及Simon公子黃浩鈞都嚟撐場。
外界一直揣測「梁粉」陣營將官運亨通，Simon就擰頭話無佢份：「CY都無搵我入政府。」但對出選立法會飲食界就會積極考慮。到底Simon同CY係真熟定假熟，睇番一張陳年相，就好清楚。
話說○九年台灣風災，飲食界發動齊心賑災，Simon搵嚟當年仲係行政會議召集人嘅CY上台沖奶茶。CY用十分鐘就學識沖茶，佢拎起茶壺，沖咗杯「處男奶茶」拍賣，成功籌得一萬二千元。呢段奶茶情緣，有相為證。睇怕他日CY上任後唔派錢，派杯自家奶茶，應該唔錯。
話時話，Simon猛呻舖租貴到無倫，話銅鑼灣波斯富街一個舖位，舖租一個星期貴十萬。佢咁多苦水，唔知未來特首幫唔幫到佢呢？
卓妮