政情：立會大懶蟲勢必連任
立法會秘書處建議下屆全體議員大幅加薪一倍，如果出席率極低嘅立會四大懶蟲黃宜弘、霍震霆、李國寶同劉皇發都有得加，咁就真係人神共憤喇！日前我哋見到下任中華總商會會長熱門人選、「牛仔褲大王」楊釗，問及中總立會代表黃宜弘（IQ博士）懶於問政時，楊釗都話要向當事人了解吓情況。
霍震霆談加薪面懵懵
另一懶蟲霍震霆尋日亦現身另一活動，問及大幅加薪是否合理，佢推說要睇其他議員意見，對於外界以佢嘅表現作為反對議員加薪嘅例證，佢就笑而不答，尷尷尬尬咁行咗去。
講開又講，IQ博士盤據中總立會議席十幾年，原本盛傳中總副會長方文雄及全國政協委員黃英豪今屆都有意挑戰佢，不過繼方文雄表態唔選之後，日前黃英豪都同我哋講，指IQ博士出到聲想連任，佢梗要支持喇！因為佢爸爸黃乾亨同IQ博士嘅爸爸黃克立係老友，黃乾亨仲係IQ博士老婆梁鳳儀嗰間「勤＋緣媒體服務公司」嘅創始股東之一，黃英豪自己依家都係董事。睇嚟不論IQ博士再點樣懶散，都鐵定可成功連任。