笑看天下:謙卑得感情混亂

煲呔曾臨走驚杯茶凍成霜,於是又發揮蔭「權」的本色,通過「小特首」訪問,大放厥詞,一來煲滾杯茶,等佢襟涼啲,二來再往自己臉上貼金,三來又發揮吓「煲呔飛刀,百發百中」——直插向缺失處處無力挽嘅唐唐心口,舔到盡神功,問你服未?

「今宵春與人同暖,倍覺承平意味長。」煲呔曾咁識利用寸光陰,成王敗寇,做得特首,點都有幾分功夫仔啩?於是佢鼓勵青少年,一個人千祈唔好咁輕易就放棄,自己四十多歲時都唔知自己原來可以做特首架。「寂寞的推銷員」一旦飛上枝頭,哪怕「窗前東北風方急」!

煲呔曾義正詞嚴話喎——立志從政嘅人,應該要潔身自愛,身為公眾人物、社會領袖,要以身作則,一言一行都要深思熟慮;至於從政原則,要謙卑服務市民、多聽意見,此外就係有勇氣承擔責任,即使有啲嘢做咗畀人批評,但只要對社會長遠有好處,都唔應該怕畀人鬧。

一個人一朝得志,講大話都中氣十足,一啲都唔似語無倫次,更可以令謊言變得鏗鏘有致,直情聖賢上身,潔身自愛到「質本潔來還潔去」,真係從政者都可以係聖嬰嘅化身。各位,佢講呢番話嘅時候,大家睇唔睇到佢頭上有光環呢?

你說煲呔曾謙卑嗎?若然,上帝就笑了。你看他在最後一份施政報告,把港英政府和特區政府混為一談,變為「我們」。唐唐感情缺失,他是感情混亂,真是謙卑得「忘我」啊!