政情：社民連狙擊施政報告諮詢會

到科學館踩場

不過，無論點都好，社民連同人民力量已講明會狙擊到底，誓要令煲呔曾難睇。

社民連已經發起「狙擊施政報告諮詢會——立即撤回遞補機制，要求曾蔭權下台」行動，呼籲支持者今日五點半鐘齊集科學館。今年三月社民連成員送粟米斑塊飯畀煲呔曾，今日會送乜嘢呢？

社民連副主席吳文遠話暫時未諗，反正佢哋嘅行動好多時都係無乜計劃，總之大前提係要向煲呔曾問責。

至於人民力量亦醞釀衝擊行動，主席劉嘉鴻只係煩緊主打邊個議題，事關由民生問題以至警權過大，又或者係替補機制等，統統都同煲呔曾有關，但終極訴求就係要煲呔曾下台！