政情：美女廚神教煮抗通脹餐
通脹猛於虎，市民生活百上加斤，有政黨就出招幫市民設計出「抗通脹菜單」，列出一周七日嘅三餸一湯菜單，平均每日只須六十一元就有均衡營養。立法會議員陳克勤尋日親自率領新界青年聯會理事呂迪明（Casta）同沙田青年協會副主席董健莉（Kelly）兩個美女廚神，即席烹調菜心炒牛肉及魚肉蒸豆腐兩味抗通脹菜式。
睇Casta同Kelly嘅功架，平時都應該有入吓廚房煮嘢食，因為佢哋揸起鑊鏟時都有板有眼，其中Casta將菜心炒牛肉上碟前，仲識得學啲大廚咁將碟餸擺得靚靚，真係有姿勢又有實際，但佢回想起首次入廚嘅驚險經歷真係抹一額汗。
Casta自爆，首次入廚係中一家政堂，切蘿蔔時唔小心切親手指流血，佢即時想抹走啲血扮無事，但當然逃唔過眼利嘅家政老師啦。Kelly就係典型深閨女孩，每月至少都會返屋企煮飯一次，而且每逢周日又會約埋一大班朋友，各自帶一道菜一齊開餐，認真開心。