政情：陳克勤近照似王國興？

立法會議員陳克勤最近喺新界東就廣發工作報告，交代過去一年嘅工作成果，報告仲用咗張佢笑得好燦爛嘅相作為封面，不過一眾街坊對於呢張封面相嘅意見不一，有街坊覺得佢好醒目靚仔，有街坊話覺得老成持重咗好多，而且仲見到啲疑似眼紋，有人仲話呢張相直情有七八成似工聯會嘅立法會議員王國興。

今年卅五歲嘅克勤仔話，自己曾經聽過有街坊話佢如果笑得過於燦爛，就會有眼紋出現，但佢覺得自己笑得自然又開心，着粉色恤衫又精神啲，所以就聽從設計師嘅意見揀咗呢張相。話唔定佢呢個選擇，可以吸引較成熟嘅選民。

克勤仔同王國興嘅歲數相差廿幾年，如果要講話佢哋兩個相似，都係頭髮前面嘅劉海最似，王國興都係早幾年梳咗個劉海髮型，睇起嚟青春咗唔少。兩個人唔知係唔係出自同一髮型師嘅手筆呢？