政情:蔡衍明吸高壓氧醒神咗

亞視股權糾紛官司仍然未搞掂,甚少喺香港露面嘅股東、旺旺集團董事長蔡衍明,尋日喺公布業績前就同一班傳媒見吓面,雖然佢提起亞視表現得好激動,但份人就好風趣幽默同健談,仲玩意多多,又講自己每日都吸高壓氧一個鐘,開會鬧人都順氣啲喎。

旺旺業務不斷擴張,身為董事長嘅蔡衍明自然業務纏身,佢話每日只係瞓四個幾鐘,身形略胖嘅佢原來患有睡眠窒息症,但佢買咗部呼吸機返屋企都唔用,事關部機搞到佢瞓得唔好,反而戴個牙套瞓覺效果仲好喎。早排佢仲花咗二百幾萬台幣(逾五十萬港元)買咗部高壓氧機擺喺屋企,每日都入去吸一個鐘,腦筋清醒連開會鬧人都比較順暢,而且每日瞓三個鐘就精神百倍咁話,仲話喺入面做拉筋效果仲好,可紓緩痠痛。

蔡衍明業務分布各地,經常坐私人飛機飛來飛去,早排又買咗艘遊艇,仲揸咗去南丫島食海鮮添!不過,佢就話遊艇唔好玩,唔及飛機咁實用,因為今年三月日本福島大地震當日,佢囝囝蔡紹忠就喺日本搭佢部私人飛機安全返回台灣。佢除咗買飛機同遊艇外,仲喺香港同內地買樓投資,有記者打趣叫佢去歐洲買古堡,佢就好幽默話會買鬼屋,認真搞笑。

不過,蔡衍明話每次返港就會諗起亞視,仲會好激動,事關好不滿亞視唔當佢個仔同助手黃寶慧係董事,唔開會又唔交財務報表,仲話亞視依家仲欠佢二千三百萬未還喎,原來筆錢係佢喺○九年底買咗亞視發行嘅可換股債券,但亞視收咗錢後就一直未有發出可換股債券畀佢。亞視發言人話,因為蔡衍明早前唔滿意可換股債券價錢而入稟法院凍結咗筆錢,所以亞視先還唔到錢畀佢。

殷莉被逼供變喊包

另外,亞視新聞部不滿財經節目《走進上市公司》及《理財博客》主持人殷莉,攞住個主播及首席財經記者銜頭走去做廣告性質嘅節目,更打算剪輯部分內容喺新聞節目中播放。殷莉尋日出來澄清時,就畀亞視記者一邊拎住個電話一邊質問,好似有人喺電話教路咁,個記者質疑殷莉以新聞從業員身份去拉廣告係違反新聞專業操守,最終逼到殷莉激動落淚,聲言自己係以一個傳媒人去做嘢。廣管局就話,根據《電視通用業務守則》,新聞節目不得接受贊助,否則便屬違規。

Money18免費即秒股票報價網站現推出8升級功能,財經資訊,實時實發!