今個星期，政圈大事莫過於國務院副總理李克強率團訪港三日，唔少場合都可見港府司局級官員做布景板。不過，領導人一走，官員就集體快閃，拿拿聲放假抖暑，其中以財爺鬍鬚曾放得最徹底，佢由今日起放假半個月，話之你環球金融市場大動盪，打緊仗都可以放心放長假，究竟呢個係乜嘢財爺呢？
每年暑假都係高官放大假嘅旺季，事關行政會議、立法會都放暑假，高官亦趁呢段時間抖抖，但今年既有新政府總部搬竇嘅大事，又有領導人訪港，據聞官場唔少人都特登取消或更改原定嘅假期，所以李克強訪港呢場大龍鳳啱啱落幕，啲高官就個個趕住快閃。
鬍鬚曾同運輸及房屋局局長鄭汝樺都由今日起放假，鬍鬚曾一放就去到下個月五日，鄭汝樺就只係放三日抖抖啫。另一個緊接放兩日假嘅係民政事務局局長曾德成。過去幾日，鄭汝樺陪咗領導人參觀房署總部及公屋家庭等地方，唔知係咪太過辛苦，所以要放假回吓氣。