中環出更：復建居屋商界人人撐
支持復建居屋嘅民意沸騰，一眾城中名人都一面倒投贊成票。投資地產頗有心得嘅莎莎國際主席郭少明話，樓價只會愈來愈高，政府應該復建居屋幫助唔同階層嘅人。香港孔教學院院長湯恩佳都話，新加坡嘅組屋政策成功令當地人安居樂業，但比星洲更早推行居屋政策嘅香港，到依家都仲未解決港人住屋問題，港府認真係漠視民間疾苦。
平時好少評論政事嘅郭少明，日前出席一個公開活動時都忍唔住出聲，事關佢眼見樓價有升無跌，小市民置業嘅夢想就愈來愈遠，認為政府不能再坐視不理。佢又話，恢復居屋供應唔會影響私人樓市，因為居屋嘅定位同私樓唔同，政府應該拿拿聲決定復建居屋，幫助唔同階層嘅市民置業。
湯恩佳：新加坡成功過香港
湯恩佳都話復建居屋好重要，因為唔同階層嘅市民有唔同嘅需要，佢眼見身邊嘅朋友供樓供得好辛苦，所以政府應該了解民情，做應該做嘅事。佢話鋒一轉，話香港喺英國管治時代就率先推出居屋，名為「居者有其屋」，但新加坡嘅組屋政策反而成功過香港，星洲人安居樂業，港人就繼續望樓興嘆。
亞洲金融集團董事長陳有慶日前出席汕頭商會創會六十五周年酒會時，都話復建居屋可幫助有需要嘅人。同場嘅廣東社團總會主席王國強態度更加堅定，佢話一定要復建居屋，事關對解決民生問題好重要。商界名人個個都體會到市民之苦，可惜高薪厚祿嘅煲呔曾依然懶懶閒，保持一貫夕陽政府作風，你急佢唔急。
卓妮