鄉議局就新界村屋僭建問題同政府開戰，北區四個鄉事委員會包括上水、粉嶺、沙頭角與打鼓嶺率先企埋同一陣線，尋日舉辦聯合就職典禮，以示團結。據悉，鄉議局高層都對北區四個鄉委會呢個做法好欣賞，破天荒同意四區係鄉議局新大樓開幕前，喺新大樓嘅大劇院筵開一百五十席盆菜宴，呢個排場真係可一不可再，事關劇院今後只會用作表演之用。
話說鄉議局為咗畀北區四個鄉委會擺盆菜宴，特別搬走晒劇院嘅觀眾席座椅；同樣為咗避免啲盆菜圓枱腳刮花劇院嘅地板，所有枱腳都要特別包番個膠套，認真大工程。北區四個鄉委會鄉紳都笑容滿臉，上水鄉委會主席侯志強亦瞓身做好各項安排，甚至將自己煮盆菜嘅心得向酒樓大廚傾囊相授，令在場嘉賓、村民都可以食到最正宗嘅圍村盆菜，食到捧住個肚離開。
據講沙田鄉委會下月六日都喺新大樓嘅大劇院舉行就職禮，但就冇講到當日有冇盆菜食。