政情：羅太睇報紙先知史美倫劈炮
行政會議成員兼港區人大代表史美倫，前日突然以職務繁忙為由辭任大學教育資助委員會主席，畀教育界質疑佢對大學教育嘅承擔，並批評政府成日搵埋啲外行人掌管教資會，令香港嘅大學教育搞到不倫不類。做過多年教育高官嘅港區人大代表羅范椒芬，亦唔敢公開撐佢嘅港區人大同事，拒絕評論史美倫提早劈炮係咪不負責任。
羅太尋日出席一公開活動時被問及史美倫劈炮事件，強調自己都係睇報紙先知道有關消息，史美倫事前冇同佢傾過喎。羅太承認教資會工作繁重，又要招待訪港嘅外國學者，史美倫喺滙豐非執行副主席嘅工作亦好忙，呢啲都係不爭嘅事實。
對於教育界要求搵番內行人掌教資會，羅太認為未必需要，例如史美倫都唔係來自教育界，但之前喺教資會嘅工作都好用心。但問及史美倫中途劈炮係咪不負責任，羅太就推說自己冇做教育好耐，今次事件已同佢無關，唔想多作評論喎！