中環出更：愛女辦學有成 肥亨安慰
年輕人創業做生意，總希望實現理想又搵到錢，但中策集團主席馬時亨嘅大女馬露明，就覺得理想重要啲。露明喺○九年開辦咗德育學校JEMS Learning House，首年只係得三十幾個學生入讀，而且好多都係畀面佢爸爸肥亨去入讀嘅，但到咗尋日第二屆畢業禮，畢業人數激增到百多人，好多學生家長都唔識肥亨嘅，證明露明做出成績，肥亨都覺得好安慰。
年輕人創業，首筆資金好緊要，所以肥亨都有贊助露明開學校。不過，喺財經界身經百戰嘅肥亨就覺得，露明呢盤生意賺錢都係其次，教育理念同愛心先至係最重要。呢兩年畢業禮都係以籌款形式舉行，學生一腳踢開檔義賣自己嘅親手製作嘅精品，為心光盲人學校及奧比斯籌款，去年籌得七萬元以上，今年仲超過呢個數添，所以肥亨覺得「回報」已經好好了。
