終審法院早前決定就剛果民主共和國債務案提請全國人大常委會解釋《基本法》。鐵頭仁尋日喺立法會內務委員會，提議喺下周三嘅立法會大會就事件進行休會辯論，強調今次係終院首次主動提請人大釋法，屬「重大事件」兼對社會具深遠影響，好應該提供平台畀議員表達意見，供人大常委會參考。
不過，過往鮮有就司法問題發言嘅象哥，忽然變身「法律超人」，話司法獨立係香港嘅寶貴基石，依家法庭仍未就案件進行判斷，人大常委會亦未正式釋法，立法會喺現階段就事件進行辯論，係「赤裸裸干預司法獨立」。內會最後喺建制派反對下，否決就釋法問題進行休會辯論。