中環出更：李垂誼返港與眾同「樂」
著名大提琴家李垂誼（Trey）有唔少名人粉絲，例如中華總商會會長蔡冠深太太蔡關穎琴，就同Trey好有緣分，去年蔡太更加出錢出力成立「垂誼樂社」，全力支持Trey以音樂會友嘅心願。前日樂社首次舉行活動，幾十名核心成員同埋親友共聚一堂，定居德國嘅Trey特登返港與眾同樂，獻上幾首拿手樂章，個個知音都聽出耳油，認真耳福不淺。
當日出席嘅核心成員有樂社主席蔡太、出任會長嘅Trey家姐李垂音及理事紀文鳳，金至尊母公司香港資源副主席許浩明都喺度，原來佢太太何文琪係樂社義務秘書，佢仲特登現身為太太打氣，場面十分溫馨。
蔡太帶隊敦煌搵靈感
經常喺世界各地表演嘅Trey原本係難得嘅港產音樂家，但原來佢已長住德國首都柏林。Trey話畀卓妮聽，自從東、西德統一之後，德國銳意將佢哋引以為傲嘅藝術文化發揚光大，十分歡迎世界各地藝術家長住，所以吸引好多其他國家藝術家入籍或定居。喺現代藝術家心目中，柏林早已取代維也納，成為新嘅「音樂之都」。Trey仲話，現時有幾千個音樂家長住柏林，佢搭地鐵時總會撞到一個音樂家咁滯，認真誇張。
講番樂社嘅搞作，蔡太話，佢哋將會拉大隊去敦煌，到當地尋找創作以敦煌為主題嘅樂章靈感，佢都會隨團去玩吓。今次團員有機會親入洞穴去開眼界，全靠「敦煌之友」成員紀文鳳幫手。敦煌創作未問世之前，Trey話會率先將內地知名戲劇《紅樓夢》嘅主題曲改編，由兩分幾鐘改成適宜大提琴演奏嘅四十分鐘樂章，大家拭目以待喇！
卓妮