中環出更：葉澍堃陪妻購物自娛解悶
識得氹老婆嘅男人幾時都咁聰明，好似馬會大董葉澍堃（Stephen），每次見親佢都同太太秤不離砣，恩愛到羨煞旁人，所以問佢有咩夫妻相處之道就最啱。Stephen自爆秘技，當太太全情投入去購物，佢都有自娛嘅妙法。
坐低寫稿歎咖啡
Stephen好識氹老婆，不時都會同太太出外行吓、玩吓、食吓，兼且買吓，好多男士都怕陪太太Shopping，覺得好悶，Stephen就唔係咁諗，好似佢啱啱上個月先同太太去歐洲，行程之一當然係去名店朝聖啦，上次喺巴黎嘅Hermes，Stephen好有耐性咁坐喺佢哋張靚梳化度，歎杯咖啡，順便寫稿，難得佢哋嘅咖啡好飲又係免費，所以就算要等幾個鐘，Stephen都自得其樂。
做好老公當然要夠疏爽，好似今次歐洲之行，佢就買咗個Hermes同Chanel手袋畀太太，不過佢話唔係買限量版，只係買咗最普通嘅款式。其實買咩又有乜所謂，最緊要係佢記得老婆鍾意咩牌子，就包無撞板喇。