中環出更：楊國佳冧妻 16萬買支香水王
香水，令女人瘋狂，男士傾倒。為博佳人一笑，工廈大王楊耀松長子楊國佳（Alex）前日以十六萬港元，購入一支全港獨有嘅法國嬌蘭（GUERLAIN）香水送畀嬌妻。呢個紀錄，睇怕足以寫入香港歷史。
全球僅47支
本年度法國五月藝術節搞搞新意思，前日喺金鐘太古廣場舉行《香水傳奇》展覽，大會展出五十五件由收藏家珍藏已久嘅香水，其中一支古董香水，更產自一八四○年添。數全場最矚目，係全球僅生產四十七支嘅L’Abeille嬌蘭香水，其中四十六支已名花有主，唯一一支編號38嘅L’Abeille，近日新鮮運抵香港，開價十六萬元。
工廈王子Alex知道後，第一時間扑錘買下。前晚親自迎接呢支「香水之王」，水晶樽身分量十足，Alex捧上手，笑到見牙唔見眼話：「咁香，唔使搽都暈喇！」對香水情有獨鍾嘅Alex，經常買香水氹太太開心，自己亦搽埋一份。佢話，多得留學美國時，受身邊中東石油王子女朋友影響，個個滿身香噴噴，聞得多，對香水完全唔抗拒。
當年Alex畢業後，就回港打理家族地產生意，不時行地盤，搞到滿身男人汗味，開會時好尷尬，於是搽男士香水醒醒神。佢獨愛檸檬清新香氣，唯一戒條係謝絕「大眾化」香味，擔心出街時同其他男士「撞香水」，惹來「斷背」疑雲，所以買香水時，會搵專人調配。
香水魅力沒法擋，大家樂太子女陳浩寧（Candice）、邱德根孫女邱詠筠同前東華主席梁定宇太太張雅麗，都嚟感受陣陣香氣。Candice唔靠父蔭，開設室內設計師樓，做得有聲有色，手上柯打接唔停，唔少仲係內地食肆，認真叻女。
卓妮