政情：地署證潘潔買屋後僭建
不認不認還須認，首名被揭發住所有僭建嘅問責官員、環境局副局長潘潔再次被踢爆知法犯法。根據地政總署每年更新一次嘅高空拍攝圖像，原來潘潔大埔沙欄道寓所天台嘅玻璃屋係喺佢○九年八月買入單位後僭建，唔怪之得之前佢被問及幾時起玻璃屋時只係含糊其詞，今次有鐵證在手，睇怕佢都冇得再抵賴。
交代事件 含糊其詞
潘潔上月回應屋企僭建問題時，死都唔肯交代天台玻璃屋幾時僭建，只係話：「幾時（僭建）都係我嘅責任。」不過，翻查地政總署分別喺○九年十二月及去年五月喺高空拍攝潘潔間沙欄小築單位嘅圖像發現，○九年嘅天台只係有小量白色位置，估計仲未有僭建物，但去年五月嘅天台白色位置就多咗，仲覆蓋咗半個天台添，明顯係佢買入單位後先至僭建玻璃屋。
尋日佢向本報回應事件時，仍堅持唔肯講僭建係咪自己興建，只係話已經委託認可人士展開清拆工程，又話會根據條例進行。僭建風暴已經吹咗大半個月，唔少官員、議員同鄉紳都中招，依家有埋地政總署嘅「高清」數碼相幫手，睇嚟仲有排煩。