政情：應家柏包糉快手快腳
尋日端午節除咗多個地區舉行龍舟競渡外，馬會義工隊亦喺青衣舉行端午萬歲宴，同區內超過七百名長者歡度佳節。萬歲宴有個包糉環節，馬會行政總裁應家柏即場同長者合作包糉，雖然包糉係中國傳統，但作為外籍人士嘅應家柏一樣搞掂，佢跟住婆婆嘅指導，快手快腳就將米同豬肉等材料放入糉葉內，話咁快就完成，連婆婆都讚佢好嘢。
送贈101歲婆婆
大家包完糉後，應家柏得悉現場有位一百○一歲高齡嘅婆婆，於是將手上隻糉送到婆婆手中。呢位婆婆好壯健，連番講多謝，而應家柏就讚婆婆好精靈，仲話完全估唔到婆婆有一百○一歲喎。除咗應家柏之外，馬會公司事務執行總監麥建華同投注事務執行總監陳承楷等管理層人員都有到場湊熱鬧，同長者們打成一片，共度一個有意義嘅端午節。