政情：何君堯任律師會會長

身兼多項重要公職，何君堯話唔擔心時間分配，因為好多嘢都上晒軌道，又有好多好兄弟同佢一齊分擔，並非佢一人單打獨鬥，加上佢九五年就開始參與律師會工作，所以已經好熟手。佢仲大派蜜糖冧太太，話本身擔任教書工作嘅何太好體諒佢添。問及立法會選舉，佢直言對法律界、鄉議局同區議會等功能界別無興趣，冇否認會否出戰新界西直選。

至於剛落任嘅前律師會會長王桂壎，就盛傳佢有意循法律界出選，如果最後屬實又雙雙勝出，兩人就可以喺立法會再次攜手合作。王桂壎之前講過冇時間諗埋啲咁嘅嘢，尋日就改口話的確有唔少會員游說佢出選，佢會認真考慮吓，不過佢啱啱先出任香港國際仲裁中心主席，又要成日返內地做律師生意，非常忙碌，未有最終決定。