政情：王忠桐：煲呔曾攞嚟衰

王忠桐係殷實商人，原本好哋哋做生意、養吓馬、做吓慈善不知幾開心，但係任何關心社會嘅有識之士，眼見政府施政每況愈下，搞到市民怨聲載道，都會睇唔過眼。上周佢呻過通脹猛如虎，搞到無論企業或市民都飽受壓力後，前日佢繼續炮轟一再修改嘅財政預算案，佢話提高汽車首次登記稅百分之十五嘅政策，被嘈多兩嘈就跪低讓步。

講到政府同樣跪低向市民大派六千元，王忠桐直言此舉散盡三百幾億元公帑更加係「多餘」，事關有錢人唔在乎呢六千元，至於對冇錢嘅人來講，又係幫得一時幫唔到一世，倒不如興建多間醫院好過。

王忠桐話鋒一轉，話唔相信呢啲咁廢嘅財政預算案內容係財政司司長一手搞出來，如果特首唔點頭冇可能推行，將矛頭直指煲呔曾。佢仲話煲呔曾好小器，如果識得向各個黨派伸出友誼之手，就唔使搞到乜嘢政策都遭受反對，依家咁嘅處境確係自己攞嚟衰，佢認真冇眼睇，語重心長話：「快啲等佢落台算啦！」王忠桐係做電子產品材料生意嘅，佢口中嘅煲呔曾，就十足一塊燒咗嘅電路板一樣，唔掉落垃圾桶都冇用。

撐馮國經范太接棒

佢又認為，香港嘅外匯基金規模喺世界排名前十位，政府唔應該再做孤寒財主，應該將公帑用喺長遠政策上，唔使搞到依家醫療、教育政策一塌糊塗。好似佢日前啱啱去參加一個乳癌中心嘅開幕禮，先至知道一般人去公立醫院做乳癌檢查，竟然要等兩年，佢好難接受咁話：「死都死咗啦！」

講起下一屆特首人選，王忠桐首選係啱啱宣布辭去所有家族職務嘅利豐太子爺馮國經，次選係全國人大常委范徐麗泰，雖然外界認為兩人年紀偏大，但佢覺得年紀愈大愈好，因為特首任期屆滿後可以真正退休，以免去向惹起利益衝突問題喎。