政情：Rita劉抱恙辭官民望反彈
香港人向來有同情心兼夾夠包容，班高官只要發現身體唔妥，大家對佢哋嘅評分都會突然反彈。有研究機構早排用電話訪問咗千幾名市民，評分升幅最高嘅高官分別係已經因病請辭嘅前商務及經濟發展局局長劉吳惠蘭（Rita），同埋被揭發腎臟出問題嘅教育局局長孫明揚。Rita評分上升，但係佢留低張空櫈就仲未有人坐，大熱門前商務及經濟發展局常秘蔡瑩璧前晚喺一個政界飯局上面重申唔會出山，江湖傳聞亦話政府已經將副局長蘇錦樑個名交到北京，一個唔覺意，好大可能由佢冷手執個熱煎堆。
孫公腎衰竭有分加
香港研究協會上月廿九日至今個月五日，用隨機抽樣方式，成功以電話訪問一千零九十個市民，評分升幅最高嘅Rita同孫公，以五分為滿分，分別得到二點八一分同二點三二分，升幅分別係○點二分同○點一一分。
香港研究協會自己分析都認為，結果同兩位高官身體抱恙嘅消息有關。香港人同情心爆棚，得出呢個調查結果確實一啲都唔意外，調查結果亦證明，留喺政府內係官員民望低嘅一個主要原因。
連續廿四次位居局長評分榜首嘅保安局局長李少光喺夕陽政府之內工作，評分亦不免下跌，雖然少少哋跌咗○點○九分，不過得分仍然冠絕一眾局長，得到二點九四分。雖然研究機構冇講到點解李少光評分下跌，不過估都估得到係同警方派重案組調查艾未未塗鴉事件有關啦！
高官喺市民心中表現麻麻，就連政府想搵人幫手都唔係咁易。Rita上個月初辭職，依家成個月張櫈仔都冇人坐，原本大熱門之一嘅蔡瑩璧早就拒絕再作馮婦做高官，佢前晚喺一個政界飯局中講明，自己身體冇乜事，但真係好擔心做局長後壓力會令身體變差，思前想後都係決定唔會復出，即係話煲呔曾即使親自出面都肯定要食檸檬。
傳蘇錦樑待京批核
有江湖傳聞話，政府已經將蘇錦樑呢個「廖化」嘅名交咗畀北京，如果收貨就畀佢頂上算數。總之講到尾，呢個夕陽政府路路不通，做乜都唔順利，一旦要由蘇錦樑頂上局長大位，特區政府可能又要煩第啲嘢喇。