中環耳目：李應生偕友歎自家藥膳雞
香港中藥業協會理事長李應生係百成堂第三代傳人，佢唔止將家族生意打理得井井有條，仲將中藥入膳嘅食療養生品味發揚光大。早前佢約埋協會監事長兼嶺南藥廠總經理呂偉強，喺中環域多利皇后街嘅北園酒家食午飯，李應生特登拎自家至靚藥材，畀酒家炮製具行氣補血功效嘅秘製藥膳雞，兩人一邊歎一邊傾公務，不知幾滋陰。
私伙藥材酒家炮製
呢煲獨家秘製藥膳雞，由百成堂自家黨參、當歸、北芪、烏豆同埋紅棗為材料，揀選新鮮走地雞秘製而成。李應生話，佢經常自備藥材畀中華總商會俱樂部餐廳如法炮製，當煲藥膳雞熱辣辣上枱，揭開煲蓋一刻，香味四溢，不禁令人食指大動。當日佢又點咗潤肺止咳嘅川貝燉鱷魚湯，再加埋幾碟小菜，已經好滿足。
呂偉強係嶺南藥廠嘅第三代傳人，風行數十年嘅萬應止痛膏正係佢哋出品。嶺南同埋百成堂都係超過九十年嘅老字號，難怪兩人咁同聲同氣。當日佢哋傾到協會換屆事宜。計卓妮話，佢哋咁有心有力，梗要冧莊做多屆喇！