政情:大輝阿Q牙痛當修煉

有病是苦,但換個角度睇,小病也是福!立法會廠商會代表林大輝前排患上嚴重蛀牙,痛到「冇聲出」,連帶佢一手創立嘅社區組織C18搞家庭日,都要缺席。好友擔心大輝茶飯不思,紛紛發短訊慰問,誰知大輝相當阿Q,回覆話:「惟有講少些話當修煉,食少些東西當修身,出少些街當修心。也未必唔好。」

大輝牙痛成個禮拜,痛楚有增無減,令佢連電話都唔想聽,匿埋屋企做「宅男」,唔知嘅,仲以為佢患咗怪病。不過,大輝腦袋仍然精靈,馬上回短訊多謝好友,仲趁機講佛偈,將上述短訊語句傳送畀朋友。大輝話,只要將心念一轉,牙痛都係修煉身心嘅好契機,呢番話充滿禪味,真係少啲慧根都聽唔明。

熟悉大輝嘅人都知道,佢無宗教信仰,但閒來喜歡鑽研佛學,尤其欣賞已仙遊嘅台灣一代佛教宗師聖嚴法師,不時將寫上法師真言嘅書籤送贈朋友。今次喺病榻中以佛家智慧安慰自己,相信做師傅嘅聖嚴法師在天之靈都感到安慰喇。

Money18免費即秒股票報價網站現推出8升級功能,財經資訊,實時實發!