- on.cc 東方互動主頁
- 5月9日 (五)
立法會尋日二讀「史上最廢」預算案，並審議議員提出嘅修訂。民主黨李華明（肥仔明）不滿漁護署淨係識捉貓狗去人道毀滅，而非先幫佢哋絕育再放生，要求刪除該署轄下捉狗隊嘅預算。肥仔明開宗明義話提修訂只係政治表態，不過引起建制派群起反對，中總代表黃宜弘（IQ博士）仲發炮大鬧民主黨，話佢哋未諮詢過貓狗意見就建議先將佢哋絕育再放生，其實係「漠視狗意」喎！
IQ博士嘅諮詢貓狗論一出，議事堂即時議論紛紛，大家都唔明如何諮詢貓狗意見，唔通係要班狗仔贊成吠一聲，反對就吠兩聲？定還是好似早前網上熱爆嘅片段咁，請個動物通靈師去了解貓狗意見？惟IQ博士冇進一步解釋就結束發言。
就連食物及衞生局局長周一嶽都借貓狗過橋，話自己都試過收養一隻喺車底發現嘅流浪貓，如果立亂拎佢去絕育，佢都可能會唔開心喎。周一鑊點知貓仔嘅意願就不得而知，但有建制派全力保皇下，肥仔明嘅修訂最終被否決，漁護署就繼續有錢用啦！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
