政情：區選臨近 大輝加碼硬銷C18
區議會選舉臨近，各黨各派都出盡法寶自我宣傳，立法會議員兼沙田區委任區議員林大輝亦唔例外，不過就唔係為自己，而係幫佢一手成立嘅政團C18（社區18）成員硬銷，而且仲愈做愈誇張添。
自C18成立以來，大輝都會喺佢每三個月出版一次嘅立法會通訊內，撥出篇幅宣傳有關活動，最初只係一版起兩版止，但隨着區選逼近，到去年底嗰期已經加到四版，三月份最新一期更加碼去到六版，部分內容更同大輝本人完全無關，包括圖文並茂咁逐個C18區議員介紹，轉述佢哋嘅地區工作同對預算案嘅意見等，似區議會通訊多過立法會通訊。
反觀大輝本身代表嘅中華廠商聯合會，喺通訊內就只得兩版宣傳，即係只及C18嘅三分之一，就算勉強計埋啲工商業界資訊，合共都只得四版。
唔知啲廠商會選民收到呢份通訊，會否因內容加咗料而開心吖，定反而覺得妹仔大過主人婆呢？