中環耳目：李大壯買台灣高麗菜氹囡囡
台灣駐港機構遠東貿易中心及台北貿易中心，日前舉行一場別開生面嘅春茗，現場銷售空運來港嘅九十棵高麗菜（椰菜），話咁快被搶購一空。港台商貿合作委員會主席李大壯（David）成功掃入五棵高麗菜，佢話囡囡好鍾意食，睇唔出佢都係個廿四孝爸爸喎！
當晚卓妮見David行色匆匆先告退，原來佢要同外父一齊食晚飯，呢個女婿真係唔話得。臨走時見到現場琳瑯滿目嘅台灣食品，佢二話不說拿出一百元，買咗五棵高麗菜。見佢堂堂大男人拿住咁多菜，個樣都幾搞笑，但佢一啲都唔介意，話落咗樓就可以擺喺車度喇！
David係台灣女婿，對台灣有咩好嘢食自然一清二楚。好多香港遊客都對清甜嘅台灣高麗菜讚不絕口，試過就知同香港常見嘅椰菜完全係兩回事，難怪David變身買菜佬都唔介意。
除咗阿女欣賞之外，佢自己都鍾意用臘肉爆炒高麗菜，清甜嘅菜葉吸收臘肉特有嘅腌味，別有一番風味。