社民連創黨主席黃毓民同立法會議員陳偉業拉隊倒戈另組「人民力量」，昔日嘅「社民立會三子」只剩「長毛」梁國雄一人。
據聞社記已訂好計劃收復失地，包括派出大批黨員喺九龍東參選區議會，為黨主席陶君行來年循該區出戰立會鋪路造勢；又正密斟前社記副主席勞永樂回巢，希望對方喺港島區當選；加埋預計可順利喺新東連任嘅長毛，再次由一子變番做三子，想掃枱掟嘢都多兩對手。
不過，呢個如意算盤係咪打得響，仲要視乎該黨能否氹掂喺港島扎根多年嘅曾健成（阿牛）棄選。上屆勞醫生臨選舉前退黨，除咗因為黨址租約糾紛，另一深層次矛盾正係阿牛堅拒讓路，最後導致兩人喺港島區互撼，浪費晒啲票源。
有黨核心聲稱阿牛今次應該會肯讓路，但阿牛接受我哋查詢時就唔係咁講，批評勞醫生當日係「傷住個黨咁走」，認為佢「走出去就無謂返嚟」、「要還番黨一個公道」。至於佢會否繼續出戰港島定係讓路畀對方，佢就話係另一回事喎。